(NI BETH JULIAN)

MISTULANG buong gobyerno ng Pilipinas ang pupunta sa Japan dahil halos mayorya ng mga miyembro ng Gabinete ni Pangulong Rodrigo Duterte ang kasama nito sa Tokyo.

Sinabi ni Philippine Ambassador to Japan Jose Laurel V, 16 na mga Gabinete ng Pangulo ang kasama at ang gastusin ay sagot ng Japanese firm na Nikkei.

Ayon kay Laurel, aabot sa 200 ang mga opisyal at support staff ang kasama sa delegasyon ng Pangulo.

Sinabi pa ni Laurel na sa tingin niya ay isa na rin itong pabuya ng Pangulo sa mga miyembro ng Gabinete sa harap ng pagkapanalo ng mga kandidato ng administrasyon sa nakalipas na election 2019.

Sa impormasyong ipinaabot ng Malacanang, kabilang sa mga miyembro ng Gabinete na bitbit ng Pangulo sa biyaheng ito sina Foreign Affairs Secretary Teddy Locsin, Finance Secretary Carlos Dominguez, Agriculture Secretary Manny Pinol, Public Works and Highways Secretary Mark Villar, Cabinet Secretary Karlo Nograles, Trade and Industry Secretary Ramon Lopez, Tourism Secretary Bernadette Romulo Puyat, Transportation Secretary Anthur Tugade, Science and Technology Secretary Fortunato dela Pena, Energy Secretary Alfonso Cusi, Information and Communication Technology Secretary Eliseo Rio Jr., Director General of the National Economic and Development Authority Secretary Ernesto Pemia, PCOO Secretary Martin Andanar, National Security Adviser and Director General ng National Security Council Hermogenes Esperon, Presidential Spokesman at Chief Presidential Legal Counsel Atty. Salvador Panelo, at Presidentisl Adviser on Peace, Reconcilliation and Unity Carlito Galvez Jr.

Bagamat wala sa listahan ang mga delegado si Executive Secretary Salvador Medialdea, sinabi nito na si Justice Secretary Menardo Guevarra ang magsisilbing caretaker ng gobyerno.

Ang Pangulo at mga delegado nito ay dadalo sa 25th International Conference on the Future of Asia sa Huwebes at Biyernes.